De Schola Aestiva recensenda, quae Cisternae fuit: quid primo eius die factum sit?

De Schola Aestiva ergo Cisternae nuper celebrata nunc temporis quicquam est narrandum! Quid enim primo eius die factum fuerit commentari iuvat: qui dies Martis nempe 23 mensis Augusti fuit. Sed antequam narrandi initium facio illud in antecessu dicendum credo, me narratorem omnia quae in sinu Scholae fuerunt acta variis de causis non participavisse, unde exoritur ut commentarii non tam pleni nec universi evasuri videantur...

Franciscus Torralba acroasim habens suam

Quoquo est modo, initium facio narrandi: oportet enim sciatis, lectores dulcissimi, tramen illud ferriviarium notissimum viis angustioribus solito quod iter facere solet, e Legione exiens Cisternam fere hora decima matutina pervenit, quo vectus illam totam septimanam iter destinavi faciendum meum: liceat mihi, hunc in narrationis locum aggressus, nonnulla de tramine illo verba facere, quia valde est mirandum quomodo qua rationeque instrumentum tale communicationis, maximo in discrimine mortis necisque aliquando versatum,  nova atque utilissima usurpatoribus ita attulerit auxilia peregrinandi, ut hodierno die itinera pulcherrima, citissima cum non sint, eius ope facere possis.

Primum ergo cum advenio Cisternam, pedes rego meos ad sedem Instituti Biblici, ubi coniectura Iesum illum Garcia Recio lectiones biblicas intium explicandi facturum habeo. Neque fallor! Intrans ergo oecum praesidem video de libro Genesi introducendo loquentem, splendidissime quidem... Doleo quod machinula mea nondum adhibita imagines de ea acroase exceperim nullas! 

Media in schola Latina imagines quasdam commentantes

Et nulla mora interposita iam scholae Latinae eaeque vivae mihi fuerunt agitandae! Aliud ergo intro conclave, iam ab aliquot occupatum amentibus eis illa amentia captis ut me ductore Latinam vellent exercere linguam, eam usurpare, eam vivam (quod nefas!) adhibere! At ubinam gentium eum qui Latinam aliquando fuisse linguam credat invenire possis? O amentiae culmen! O sacrilegium permagnum! Nimirum deos omnes deasque universas pessima ad eos Latine loqui volentes ominatos omina!

At, en aspice!: paulatim paulatim sensim sine sensu sunt qui nonnulla proferre valeant, nec tam male, nonnullis autem commissis mendis! Videas videas ergo, an revera in recto sint qui linguam esse Latinam credant...

Post scholas caupona est petenda: Hispani ergo sumus omnes! Ex qua recta ad thermopolium aggredimur -credo me nos Hispanos esse iam dixisse- ubi convivium suavissimum iucundissimum amoenissimum una celebravimus.

Vesperi cum iam simus, novas commentandas, quae fuerunt,  lectiones habeo: hora enim sexta postmeridiana coram frequente circumstantium corona Franciscus ille Torralba, professor philosophiae in Universitate c. n. Raimundus Lullius egregius qui est, acroasim optimam de silentio necnon vita contemplativa, quam Aristoteles ille nominavit, quantum ad vitam degendam beatam humanioremque valeant, habuit.

Qua peracta oratione sodalibusque valedictis iter Legionem faciendum mihi regredienti curandum fuit.

Hactenus hodie. Crastino die nova de diebus peractis illis narrandum est.

De Aestiva Schola iam peracta

Ecce Scholae participes nonnulli primo die in atrio stantes 

Scholae iam fuerunt! Neque infauste immo luculentissime eae ad finem progressae sunt! 

Quas aestivas scholas, secunda occasione iam constitutae cum fuerint,  plus quam centum participavisse homines constat. 

  

Petrus Blanco apud bibliothecam de origine scribendi artis disserens

De argumento his diebus montaneis iis in terribus tractato, quid dicendum? Fuerunt enim qui sessionibus biblicis interfuerint, quarum maximam partem illas a Iesu García Recio de libro Genesi explanando commentandoque habitas frequentissimas exoptatissimas celebratissimas evasisse crederes. Alii autem fuere qui linguis nonnullis ediscendis tum pueruli cum aetate provectiores, maiorem dederint curam, Graecae nempe aut Latinae, Accadicae, Aegyptiae Hebraicaeve aut nonnullis aliis, splendisissime quidem. Adde etiam illud, ut ii non defuerint qui ad historiam rationesque artis scribendi atque rem mathematicam apud antiquos cognoscendam animum appulerint suum, vide denique quos catervatim acroases a doctissimis professoribus habitas auscultavisse repertos esse.

Anna Maria Perez de re mathematica apud Aegyptiam et Mesopotamiam gentes explicat

At nullo credatis modo nos quasi curatores meros doctrinae scientiaeque tantummodo evasos esse! Occasiones enim fuere quoque ad sodalium consuetudinem serendam firmandam roborandam, quarum convivia una celebrata atque excursiones ad vias Romanas reperiendas lustrandasque necnon saltationes illas orbiculares quas iucundissimo gratissimoque animo fecimus imprimis computandas credimus.

Quibus de factis rebus cum adumbrationem quamdam hodie tantum afferre velimus, progredientibus singulis diebus describere singula destinabimus facta, tali autem pacto ut non solum verbis sed imaginibus pelliculisque quoque adhibitis dilucidiorem praebere quorumcumque imaginem valeamus, quod in votis est...!